الفارق الجوهرى بين البشر

إيه الفرق بينى و بينك 

تعالى نشوف ..

فكرت كثيرا فى هذا السؤال و لم أجد له اجابة واضحة ، ألا و هو

ما الشئ الذى يفرق شخص عن الآخر ؟

و طبعا هتقولى البيئة مثلا : هقولك طيب لو حطينا الاثنين فى نفس البيئة

هتقولى الأب و الأم : هقولك طب لو حطينا الاثنين فى نفس البيئة الأسرية

هتقولى الأصحاب : هقولك طب لو خلينالهم نفس الأصحاب

هل هيطلعوا الاثنين نفس الشخصية ؟

لو كانت الاجابة : اه ، يبقى الانسان مجبر تماما

و لو كانت الاجابة : لا ، يبقى ايه الشئ الجوهرى ده اللى بيفرق الشخص عن التانى ؟؟؟

طيب هقولك حاجة تانى : مثلا لو اثنين فى عيلة كلها حرامية ، هتلاقى واحد يطلع حرامى وواحد يرفض ، طب ليه ؟؟

هتقولى العقل : طيب ما التانى برده عنده عقل ، ايه اللى فرق يعنى ، الارادة : طيب ايه اللى خلى ده عنده ارادة و ده لا ؟

رأيى : أن هناك شئ جوهرى هو اللى بيفرق بين واحد و التانى ، لكن ايه هو أو اسمه ايه مش عارف  

ثانيا : بعد البحث الطويل توصلت الى بعض النتائج الهامة لكنى أيضا لم أصل الى حل

•  ان الانسان هو نتيجة لعوامل اجتماعية و فسيولوجية مجبر عليها و غير متحكم فيها تماما 

• يظل الانسان متلقى و مجبر مسير للعوامل المحيطة به حتى يصل الى مرحلة ما ، يكتمل فيها و عيهو يمتلك ارادة و يتبنى طريقة تفكير ؛ مع الاعتبار انه وصل الى هذه المرحلة نتيجة لكل ما سبق .

•  لو الانسان اتصرف فى موقف ما أو اختار اختيار معين من اختيارات الحياة فأن هذا التصرف أو الاختيار بيبقى نتيجة بناء شخصيته اللى هى اتكونت نتيجة الأسباب الاجبارية اللى اتكلمنا عليها فوق .

مع التقدم فى البحث و جدت أن الانسان فى بعض الأحيان يكون لديه القدرة على الاختيار، بس برضه ايه اللى يخلى انسان يختار و انسان لا ، يعنى بتيجى منين القدرة دى ؟

و أود أن أطرح السؤال بطريقة أخرى كى أوضح وجهة نظرى

أين الشئ أو الفعل الذى يتصرف فيه الانسان بصورة حرية كاملة ؟